ബെംഗളൂരു: ഗതാഗതക്കുരുക്ക് രൂക്ഷമാകുന്ന ഐടി നഗരമായ ബെംഗളൂരുവില്‍ ഗതാഗതം സുഗമമാക്കാൻ 420 കോടി രൂപയുടെ നാലുവരി ഫ്ലൈഓവർ പദ്ധതി പരിഗണനയില്‍.ഹെബ്ബാള്‍ – മേഖ്രി റൂട്ടിലെ തിരക്ക് ലഘൂകരിക്കുന്നതിന് 420 കോടി രൂപയുടെ 1.6 കിലോമീറ്റർ നാലുവരി എലിവേറ്റഡ് കോറിഡോർ പദ്ധതിയുമായി ബാംഗ്ലൂർ ഡെവലപ്‌മെന്റ് അതോറിറ്റി (ബിഡിഎ). മേഖ്രി സർക്കിളിലെ നിലവിലുള്ള തടസ്സങ്ങള്‍ ഇല്ലാതാക്കുക, ഗതാഗതം മെച്ചപ്പെടുത്തുക, യാത്രാ സമയം കുറയ്ക്കുക എന്നിവയാണ് പുതിയ മേല്‍പ്പാലം ലക്ഷ്യമിടുന്നത്.നാലുവരി ഫ്ലൈഓവർ പദ്ധതി 18 മാസത്തിനുള്ളില്‍ പൂർത്തീകരിക്കാനാണ് ലക്ഷ്യമിടുന്നത്. ബെംഗളൂരുവിലെ യാത്രക്കാർക്ക് ആശങ്കയാകുന്ന ഹെബ്ബാള്‍ ഭാഗം ഗതാഗതക്കുരുക്ക് രൂക്ഷമായ ഭാഗമാണ്. ബെംഗളൂരു നഗരമധ്യത്തിനും വിമാനത്താവളത്തിനും ഇടയിലുള്ള ഹെബ്ബാള്‍ ഫ്ലൈഓവറില്‍ കനത്ത ഗതാഗതക്കുരുക്കാണ് അനുഭവപ്പെടുന്നത്.
തിരക്ക് ലഘൂകരിക്കാനായി ഫ്ലൈഓവറില്‍ ഒരു അധിക റാമ്പ് നിർമിച്ചെങ്കിലും പ്രശ്നം പരിഹരിക്കപ്പെട്ടില്ല. ഈ സാഹചര്യത്തിലാണ് പുതിയ പദ്ധതിയുമായി ബിഡിഎ രംഗത്തുവന്നത്.മാർച്ച്‌ 26ന് നാലുവരി ഫ്ലൈഓവർ പദ്ധതിക്കുള്ള ടെൻഡർ ക്ഷണിച്ചു. നേരത്തെ 2025 ഡിസംബർ 25ന് ടെൻഡർ നടത്താൻ തീരുമാനിച്ചിരുന്നെങ്കിലും പുരോഗതി കൈവരിക്കാനായില്ല. നിർദിഷ്ട എലിവേറ്റഡ് കോറിഡോർ യുഎഎസ് സ്റ്റാഫ് ക്വാർട്ടേഴ്‌സിന് സമീപം ആരംഭിച്ച്‌ മേഖ്രി സർക്കിള്‍ വരെ നീളും. ഗതാഗതം സുഗമമാക്കുന്നതിനായി മേഖ്രി സർക്കിളില്‍ ഉയർത്തിയ റോട്ടറി ജങ്ഷൻ വികസിപ്പിക്കുക എന്നതാണ് പദ്ധതിയുടെ പ്രധാന സവിശേഷത. യശ്വന്ത്പൂരില്‍ നിന്ന് ജയമഹലിലേക്ക് യാത്ര ചെയ്യുന്ന യാത്രക്കാർക്ക് കണക്റ്റിവിറ്റി മെച്ചപ്പെടുത്തുന്നതിനായി രണ്ട് ഡൗണ്‍ – റാമ്പുകള്‍ ആസൂത്രണം ചെയ്തിട്ടുണ്ട്. ഒരു റാമ്പ് സിവി രാമൻ റോഡ് വഴി യശ്വന്ത്പൂരിലേക്ക് നയിക്കും, മറ്റൊന്ന് ജയമഹലിലേക്ക് പോകുന്ന വാഹനങ്ങള്‍ക്ക് സൗകര്യമൊരുക്കും.
രാമൻ റിസർച്ച്‌ ഇൻസ്റ്റിറ്റ്യൂട്ട് ഗേറ്റിന് ശേഷം അലൈൻമെന്റില്‍ മാറ്റങ്ങള്‍ വരുത്തിയിട്ടുണ്ട്. യശ്വന്ത്പൂരിലേക്കുള്ള താഴേക്കുള്ള റാമ്പ് ഗതാഗതക്കുരുക്ക് കുറയ്ക്കുന്നതിനും സുഗമമായ വാഹന ഗതാഗതം ഉറപ്പാക്കുന്നതിനുമായി നീട്ടിയിട്ടുണ്ട്. ഭാവി വികസനം മുന്നില്‍ കണ്ട് നിർദിഷ്ട കിഴക്ക് – പടിഞ്ഞാറ് എലിവേറ്റഡ് ഇടനാഴിയും രൂപകല്‍പ്പനയില്‍ ഉള്‍പ്പെടുത്തിയിട്ടുണ്ട്. പദ്ധതിക്ക് അധിക ഭൂമി ഏറ്റെടുക്കല്‍ ആവശ്യമില്ല എന്നത് ശ്രദ്ധേയമാണ്.ബെല്ലാരി റോഡില്‍ സൗകര്യങ്ങളുള്ള ഇന്ത്യൻ വ്യോമസേന പരിശീലന കമാൻഡ്, പാരച്യൂട്ട് റെജിമെന്റ് എന്നിവയുള്‍പ്പെടെയുള്ള പ്രധാന പ്രതിരോധ സ്ഥാപനങ്ങളില്‍ നിന്ന് ഇതിനകം തന്നെ അനുമതി നേടിയിട്ടുണ്ട്. റൂട്ടില്‍ നിലവിലുള്ള രണ്ട് ഗ്രേഡ് സെപ്പറേറ്ററുകള്‍ ഉണ്ടെങ്കിലും ഭാവിയിലെ ഗതാഗത ആവശ്യങ്ങള്‍ക്കുള്ള ദീർഘകാല പരിഹാരമായി ഹെബ്ബാളിന് സമീപം ഒരു ചെറിയ തുരങ്കവും അധികൃതർ പരിഗണിക്കുന്നുണ്ട്.