ബെംഗളൂരു: നഗരത്തിന്റെ കിഴക്കൻ മേഖലകളിലെ ആയിരക്കണക്കിന് യാത്രക്കാർ ഏറെ നാളായി കാത്തിരുന്ന ഈസ്‌റ്റ് റെയില്‍വേ സ്‌റ്റേഷൻ വീണ്ടും പ്രവർത്തനം ആരംഭിച്ചത് കഴിഞ്ഞ ദിവസമാണ്.പുനർവികസന പ്രവർത്തനങ്ങള്‍ക്കായി 2025 മാർച്ചില്‍ അടച്ചിട്ടിരുന്ന സ്‌റ്റേഷൻ വീണ്ടും തുറന്നതോടെ ഫ്രേസർ ടൗണ്‍, കുക്ക് ടൗണ്‍, റിച്ചാർഡ്‌സ് ടൗണ്‍, കോക്‌സ് ടൗണ്‍ എന്നിവിടങ്ങളിലെ താമസക്കാർക്കും സ്ഥിരം ട്രെയിൻ യാത്രക്കാർക്കും വലിയ ആശ്വാസമാണ് ലഭിച്ചിരിക്കുന്നത്.എന്നാല്‍ സ്‌റ്റേഷൻ വീണ്ടും തുറന്നെങ്കിലും വികസന പ്രവർത്തനങ്ങള്‍ പൂർണമായി പൂർത്തിയായിട്ടില്ലെന്നതാണ് യാത്രക്കാരുടെ പ്രധാന പരാതി. കുടിവെള്ള സൗകര്യങ്ങള്‍, ശൗചാലയങ്ങള്‍, പ്ലാറ്റ്ഫോം ഷെല്‍ട്ടറുകള്‍, യാത്രക്കാർക്കായുള്ള ഇരിപ്പിടങ്ങള്‍ തുടങ്ങി നിരവധി അടിസ്ഥാന സൗകര്യങ്ങള്‍ ഇപ്പോഴും അപൂർണാവസ്ഥയിലാണെന്ന് പ്രദേശവാസികളും യാത്രക്കാരും ചൂണ്ടിക്കാട്ടുന്നു.
ഇത്രയും പ്രധാനപ്പെട്ട ജോലികള്‍ ബാക്കി നില്‍ക്കുമ്പോള്‍ സ്‌റ്റേഷൻ തിടുക്കത്തില്‍ തുറന്നതാണെന്നാണ് പലരുടെയും വിമർശനം.നഗരത്തിന്റെ കിഴക്കൻ ഭാഗങ്ങളില്‍ താമസിക്കുന്നവർക്കായി ബെംഗളൂരു ഈസ്‌റ്റ് സ്‌റ്റേഷൻ ഏറെ പ്രാധാന്യമുള്ളതാണ്. പ്രത്യേകിച്ച്‌ മൈസൂരു ഭാഗത്തേക്കും തെക്കൻ കർണാടക മേഖലയിലേക്കും പോകുന്ന യാത്രക്കാർക്ക് ഇനി നഗരമധ്യത്തിലുള്ള ക്രാന്തിവീര സംഗൊള്ളി റായണ്ണ റെയില്‍വേ സ്റ്റേഷനിലേക്ക് യാത്ര ചെയ്യേണ്ട സാഹചര്യം കുറയും. സമയം ലാഭിക്കാനും യാത്രാസൗകര്യം മെച്ചപ്പെടുത്താനും ഈ സ്‌റ്റേഷന്റെ പുനരാരംഭം സഹായിക്കുമെന്നാണ് പ്രതീക്ഷ.റിച്ചാർഡ്‌സ് ടൗണിലെ ദീർഘകാല താമസക്കാരനായ സഫർ സെയ്‌ദിന്റെ അഭിപ്രായത്തില്‍, ബെംഗളൂരു ഈസ്‌റ്റ് സ്റ്റേഷനില് ഇൻബൗണ്ട് ട്രെയിനുകള്‍ക്ക് സ്‌റ്റോപ്പ് അനുവദിച്ചതോടെ ദിവസേന ട്രെയിൻ ഉപയോഗിക്കുന്ന നിരവധി യാത്രക്കാർക്ക് വലിയ ആശ്വാസമാണ് ലഭിച്ചിരിക്കുന്നത്. യാത്രക്കാരുടെ എണ്ണം വർധിക്കുന്നതോടെ സ്‌റ്റേഷനിലെ ബാക്കിയുള്ള നിർമ്മാണ പ്രവർത്തനങ്ങള്‍ വേഗത്തില്‍ പൂർത്തിയാക്കാൻ കരാറുകാരനുമേല്‍ സമ്മർദ്ദം വർധിക്കുമെന്നും അദ്ദേഹം പറഞ്ഞു.
അതേസമയം, സ്റ്റേഷനില് നടത്തിയ പരിശോധനയില്‍ നിരവധി നിർമ്മാണ ജോലികള്‍ ഇപ്പോഴും പുരോഗമിക്കുന്നതായി കണ്ടെത്തി. ചില പ്ലാറ്റ്ഫോമുകളില്‍ ഷെല്‍ട്ടറുകളുടെ നിർമ്മാണം പൂർത്തിയായിട്ടില്ല. യാത്രക്കാരെ മഴയില്‍ നിന്നും കടുത്ത ചൂടില്‍ നിന്നും സംരക്ഷിക്കുന്നതിനുള്ള സംവിധാനങ്ങള്‍ പരിമിതമാണ്. കുടിവെള്ള സൗകര്യങ്ങളും ശുചിമുറികളും ആവശ്യത്തിന് ലഭ്യമല്ലെന്ന പരാതിയും ഉയരുന്നുണ്ട്.കോക്‌സ് ടൗണ്‍ സ്വദേശിയും സ്ഥിരം റെയില്‍ യാത്രക്കാരനുമായ നാരായണ്‍ റാവു പറയുന്നത്, സ്റ്റേഷനില് ട്രെയിനുകള്‍ക്ക് സ്‌റ്റോപ്പ് അനുവദിച്ചതിലൂടെ പ്രദേശവാസികള്‍ക്ക് വലിയ ഗുണം ലഭിക്കുമെങ്കിലും അടിസ്ഥാന സൗകര്യങ്ങള്‍ ഒരുക്കാതെ സ്‌റ്റേഷൻ തുറന്നത് നിരാശാജനകമാണെന്നാണ്. റെയില്‍വേ അധികൃതർ എത്രയും വേഗം നിർമ്മാണ പ്രവർത്തനങ്ങള്‍ പൂർത്തിയാക്കണമെന്നാണ് അദ്ദേഹത്തിന്റെ ആവശ്യം.സ്‌റ്റേഷൻ തുറന്നതോടെ സമീപ പ്രദേശങ്ങളിലെ ശുചിത്വ പ്രശ്നങ്ങളും ചർച്ചയാകുന്നുണ്ട്. റെയില്‍വേ മതിലിനോട് ചേർന്നുള്ള പോട്ടറി റോഡ് പ്രദേശം യാത്രക്കാരുടെ തിരക്ക് കാരണം വൃത്തിഹീനമാകുന്നതായി ചില നാട്ടുകാർ ആരോപിക്കുന്നു.
പ്ലാറ്റ്ഫോം ഷെല്‍ട്ടറുകള്‍ അപൂർണമായതിനാല്‍ ചെന്നൈ, തിരുപ്പതി, മാരിക്കുപ്പം, ജോലാർപേട്ട് തുടങ്ങിയ സ്ഥലങ്ങളില്‍ നിന്ന് എത്തുന്ന ട്രെയിനുകളിലെ യാത്രക്കാർക്കും മൈസൂരു ഭാഗത്തേക്കുള്ള ട്രെയിനുകള്‍ കാത്തിരിക്കുന്നവർക്കും ബുദ്ധിമുട്ടുകള്‍ നേരിടേണ്ടി വരുന്നതായും പരാതിയുണ്ട്.ബെംഗളൂരു നഗരത്തിലെ പ്രധാന റെയില്‍വേ അടിസ്ഥാനസൗകര്യ വികസന പദ്ധതികളിലൊന്നായാണ് ഈസ്‌റ്റ് റെയില്‍വേ സ്‌റ്റേഷന്റെ പുനർവികസനം കണക്കാക്കപ്പെടുന്നത്. സ്‌റ്റേഷൻ ആധുനികവത്കരിക്കുന്നതിന്റെ ഭാഗമായി പുതിയ പ്രവേശന കവാടങ്ങള്‍, മെച്ചപ്പെട്ട യാത്രാസൗകര്യങ്ങള്‍, സുരക്ഷാ സംവിധാനങ്ങള്‍, നവീകരിച്ച പ്ലാറ്റ്ഫോമുകള്‍ എന്നിവ ഉള്‍പ്പെടുന്ന പദ്ധതികളാണ് നടപ്പിലാക്കുന്നത്.യാത്രക്കാരുടെ ആശങ്കകള്‍ക്കിടെ സൗത്ത് വെസ്‌റ്റേണ്‍ റെയില്‍വേ അധികൃതർ ശേഷിക്കുന്ന എല്ലാ വികസന പ്രവർത്തനങ്ങളും അടുത്ത ഒരു മാസത്തിനുള്ളില്‍ പൂർത്തിയാക്കുമെന്ന് അറിയിച്ചു. ജോലികള്‍ പൂർത്തിയാകുന്നതോടെ ബെംഗളൂരു നഗരത്തിന്റെ കിഴക്കൻ മേഖലയിലെ പ്രധാന യാത്രാ കേന്ദ്രങ്ങളിലൊന്നായി ഈസ്‌റ്റ് റെയില്‍വേ സ്‌റ്റേഷൻ മാറുമെന്നാണ് പ്രതീക്ഷ.